El Colexu Fundación Masaveu suspende les clases por un casu de coronavirus d'un profesor

Sanidá recuerda que nueve de les 10 persones infestaes n'Asturies tienen síntomes leves

El colexu Fundación Masaveu d'Uviéu suspendió esti llunes les clases tres el positivu por coronavirus d'unu de los sos docentes, énte la necesidá d'estudiar la posible cadena de tresmisión.

La Conseyería de Salú conseñó que ye unu de los dos últimos positivos detectaos n'Asturies, que fueron diagnosticaos nes últimes hores, y colos que'l total de casos na rexón xuben a una decena.

El Serviciu de Vixilancia Epidemiolóxica púnxose en contactu anueche cola dirección del centru que, en valorando la situación, decidió suspender esti llunes les clases "por prudencia hasta aclarar la cadena de tresmisión".

Salú va informar del resultáu del estudiu a la dirección del centru educativu pa que lu comunique al alumnáu y les sos families, informó la Conseyería nun comunicáu.

Los dos últimos positivos, dambos varones de 54 y 56 años, son contactos casuales d'otros afectaos pol COVID-19, que presenten una clínica leve y tán n'aislamientu na so casa.

De los diez pacientes con Covid-19 nel Principáu nueve presenten síntomes leves y evolucionen favorablemente.