El Gobiernu asturianu esixe a Rajoy el cambéu de víes na variante

Considera que camudar el trazáu a anchu internacional ye un despropósitu

El Gobiernu rexonal aconceyará mañana a les dieciocho organizaciones sociales y polítiques que roblaron l'Alianza sobre infraestructures del Estáu qu’Asturies necesita' p’amosar el so refugu a la decisión del Ministeriu de Fomentu de camudar l’anchu ibéricu por anchu internacional na variante ferroviaria de Payares pa cumplir l’acuerdu ente’l PP y Foro.

La convocatoria d’esti alcuentru foi anunciada güei pola conseyera d’Infraestructures, Belén Fernández, que repitió los argumentos del Gobiernu escontra d’una decisión que retrasa la entrada en serviciu d’una infraestructura que, trece años dempués del entamu de los sos trabayos, sigue ensin tener "polo menos una estimación" pa la fecha de la so puesta en serviciu.

A xuiciu del Gobiernu rexonal, a la "frustración social" xenerada polos socesivos retrasos amiéstase agora un cambéu "innecesariu" que retrasará entovía más la infraestructura y que, amás, "regala pretestos pa caltenela na indefinición".

La instalación d’anchu internacional, recuerda l’Executivu, obligaría a les mercancíes a percorrer el trazáu d’anguaño per Payares y torgaría la competitividá de los grandes cais y industries asturianes lo que supón "un despilfarru irresponsable de recursos nuna obra na que s’invirtieron más de 3.000 millones".

Amás, insiste en que la entrada en serviciu de la variante n’anchu ibéricu, como taba previsto, llevaría una mengua del tiempu de viaxe d’anguaño ente Asturies y Madrid pa viaxeros de 48 minutos mientres qu’instalar l’anchu internacional retrasaría dellos años la finalización de los trabayos "a cambéu d’un recorte insignificante de cinco minutos de la duración del trayectu".

Al marxe de la convocatoria de la 'alianza', el Gobiernu rexonal pidió xuntes "cuanto enantes" p’abordar esta cuestión tanto al ministru de Fomentu, Íñigo de la Serna, como al presidente del Gobiernu, Mariano Rajoy, "pa impidir que se consume esti despropósitu y s’atiendan los intereses d’Asturies".

"Resultaría incomprensible qu’una obra escomanada d’inxeniería tea al serviciu de la satisfacción de caprichos y obsesiones particulares envede atender a la racionalidá técnica, el provechu económicu, la meyora de les comunicaciones y l’interés xeneral", amiesta l’Executivu de Javier Fernández nun comunicáu.