El Gobiernu baraxa cambiar el modelu públicu d'ITV si sigue la fuelga

La plantiya de les ITV caltién la fuelga énte'l desalcuentru cola dirección

El Gobiernu asturianu va vese "obligáu" a plantegase un cambéu nel modelu públicu de xestión de les ITV, que namás se caltién nel Principáu y n'Andalucía, en casu de que se "cronifique" el conflictu d’Itvasa. La so plantiya empecipió una fuelga'l pasáu mes de payares, alvirtió esti vienres el xefe del Executivu asturianu, Adrián Barbón.

Barbón espresóse asina en declaraciones a los periodistes na visita que fizo a Cuaña, onde güei s'axuntó'l Conseyu de Gobiernu, dempués de que'l comité de fuelga de la empresa pública d'Itvasa decidiera anueche siguir colos paros énte'l desalcuentru col que remató la xunta caltenida esti xueves cola dirección.

La xunta allargóse cerca de seis hores ensin que fuera posible un alcuerdu entre la dirección y los sindicatos, que reclamen midíes como l'amenorgamientu de la xornada selmanal a 35 hores, l'aumentu de la plantiya y una revisión de les clasificaciones profesionales.