El Gobiernu d'Asturies y el Ministeriu d'Industria buscarán soluciones énte l'ERE de Vesuvius

Xunta con representantes del Comité d'Empresa y l'alcaldesa de Llangréu

El Gobiernu d'Asturies y el Ministeriu d'Industria pondrán tolos medios pa tratar de buscar soluciones énte l'anuncia del cese de la xera de Vesuvius na planta de Llangréu y "voltiar" la situación, aseguró esti vienres la directora xeneral d'Industria del Principáu, Rosana Prada.

Dempués de tener una xunta con representantes del Comité d'Empresa y l'alcaldesa de Llangréu, Carmen Arbesú, Prada afirmó que'l Gobiernu del Principáu púnxose "manes a la obra" dende'l "minutu cero" pa tratar de voltiar una situación na que tean en xuegu 111 trabayos.

La directora xeneral d'Industria almitió que se trata d'una "situación difícil", pero insistió en que se pondrán "tolos medios p'alcontrar alcuerdos y soluciones".

Prada amestó que'l Ministeriu d'Industria yá ta al corriente de l'anuncia fecha ayeri pola empresa y qu'igualmente pondrá "too de la so parte" p'alcontrar una solución.

El grupu Vesuvius, dedicáu a la ellaboración de productos refractarios pa la siderurxa, dio anuncia ayeri de la so intención de zarrar la xera industrial nes sos factoríes de Llangréu (Asturies), que cuenta con 111 trabayadores, y Miranda de Ebro, que da trabayu a 17, y avanzó que formalizará l'ERE'l 12 de setiembre viniente.

La multinacional, con sede n'El Reinu Xuníu, xustificó esta decisión na reorganización de la xera que ta llevando en toles sos fábriques europees énte l'estropiu que ta sufriendo la industria del aceru por un escesu de capacidá y la xuba d'importaciones de terceros países.