El Gobiernu estudia recurrir la llei asturiana que llevantó los acotamientos

La decisión nun foi notificada oficialmente entá al Gobiernu autonómicu

El Gobiernu central comunicó al Executivu asturianu qu'estudia la posibilidá de recurrir ante'l Tribunal Constitucional la reforma llexislativa aprobada pola Cámara autonómica qu'eliminó los acotamientos pal pastoréu de los terrenos afectaos por un incendiu forestal.

Sicasí, esta decisión nun foi notificada oficialmente entá al Gobiernu autonómicu pola Dirección Xeneral de Montes polo que "habrá qu'esperar" a la decisión que tome l'Executivu central, según conseñó güei en rueda de prensa'l conseyeru de Presidencia del Principáu, Guillermo Martínez.

Martínez recordo, sicasí, qu'esa modificación llexislativa nun se llevó alantre a iniciativa del Executivu autonómicu sinón al traviés d'una proposición de llei presentada pol grupu popular, que salió alantre na Cámara rexonal col sofitu de toles formaciones polítiques sacante Podemos.

El pasáu mes d'abril Asturies sufrió delles quemes -254 fueos nuna selmana- favorecies poles altes temperatures y la falta de lluvia, y organizaciones ecoloxistes, alcaldes de los conceyos afectaos y la Guardia Civil apuntaron como una de les posibles causes el llevantamientu de los acotamientos qu'entró en vigor en marzu.

Informe xurídicu

Un informe xurídicu interno del Ministeriu d'Agricultura y Pesca, Alimentación y Mediu Ambiente concluyó que la modificación de la llei que llevantó n'Asturies la veda al pastoréu nes zonas quemaes ye inconstitucional, informó la Plataforma polos Acotamientos nun comunicáu.

L'informe, que recomienda recurrir la norma asturiana, señala que'l pastoréu nestes zonas afectaes ye incompatible cola rexeneración del suelu y que pue tener graves consecuencies medioambientales.

Cola modificación de la Llei 3/2004 de Montes y Ordenación Forestal del Principáu d'Asturies, llevada alantre nel mes de marzu, Asturies pasó a ser la única comunidá autónoma que nun acota les zones quemaes al pastoréu, llamenta la Plataforma polos Acotamientos.

Nel so comunicáu señalen que cinco informes técnico-científicos, llevaos alantre por dellos organismos científicos y universitarios, pidíen nun llevantar estos acotamientos, y que, según un estudiu del Indurot de la Universidá d'Uviéu, más del 80 por cientu del suelu de la rexón ta en riesgu d'erosión altu o mui altu polos "recurrentes incendios".

Por ello, insten a les autoridaes competentes, presidente del Gobiernu, el defensor del Pueblu o 50 diputados nacionales, a recurrir esta modificación llesislativa enantes de qu'acabe'l plazu, que sedrá en dalgo más d'un mes, acaba'l comunicáu.