El Gobiernu recuerda qu'en 2016 la mayoría de los incendios fueron provocaos

El Principáu caltién el nivel 5 de prohibición de quemes

El conseyeru de Presidencia, Guillermo Martínez, señaló que, anque entá nun se pue falar de les posibles causes de les munches quemes forestales qu'afecten dende ayeri a Asturies, la estadística de 2016 reflexa qu'un porcentaxe "mui altu" fueren provocaes.

En declaraciones a los periodistes nos pasiellos de la Xunta Xeneral, Martínez conseñó amás, al respective de la posibilidá de qu'influya'l cambéu normativu que dexa'l pastoréu en terrén quemao, que les acotadures qu'hasta agora se llevaben alantre nun pudieron evitar les quemes rexistraes n'años anteriores.

El conseyeru recordó que'l Principáu caltién el nivel 5 de prohibición de quemes lo qu'inclúi sanciones pa quien les lleven alantre y que'l Plan de Quemes activóse ayeri cuando namás había cinco incendios activos pero les previsiones meteorolóxiques facíen previsible que'l númberu de focos medrara.

Esta mañana tán trabayando na estinción de les quemes dos helicópteros del Principáu a los que s'axuntaron otros cuatro medios aéreos del Estáu pa combatir una situación que ye "mui esmolecedora" nel suroccidente pola estensión de les quemes declaraes en conceyos como Ibias o Allande.

Martínez apuntó que la llucha contra los fueos rexistraos en Villalaín (Allande) y Valvaler (Ibias) resultó difícil pa los equipos d'estinción la pasada madrugada na que'l vientu llegó a soplar a más de cien kilómetros per hora y les llapaes llegaron a asitiase a cincuenta metros de dambos llugares.

Esta circunstancia obligó a facer cortafueos pa defender los dos nuedos de población d'unes llapaes que, anque afecten namás a matos, la fuerza del vientu fai falta estremar los procuros pa que nun s'espardan al traviés de les corones de los árboles o de les paveses a les zones cercanes al focu del fueu.

Ante la violencia d'estes quemes el Gobiernu optó por xubir a nivel 1 el Plan de Quemes en Villalaín y Valvaler -frente al nivel 0 del restu de la rexón- al esistir riesgu pa bienes y pa persones pola so cercanía a nuedos de población.

Dende la Conseyería de Desarrollu Rural, pela so parte, consideren que ye llueu p'afitar una rellación directa ente'l fin de les acotadures y les munches quemes, anque reconoz que ye una llectura que ta faciendo más xente.

La conseyera amosó la so esmolición polos fueos y tamién pola posible perda d'ayudes europees pa los ganaderos. Y ello porque la Xunión Europea nun concede subvenciones a les superficies quemaes.