El Montepío y SOMA nun van recurrir el sobreseimientu del Casu Hulla pa Fernández Villa

Villa yá foi condergáu a tres años de prisión por apoderase indebidamente de fondos del SOMA

El Montepío de la Minería, que fai l'acusación particular nel Casu Hulla, espresó esti vienres el so respetu a la decisión de la maxistrada de sobreseer provisionalmente la causa pal ex-líder sindical José Ángel Fernández Villa pol deterioru de la so salú mental, y polo tanto nun va presentar recursu escontra'l resolvimientu xudicial.

Nun comunicáu, el Montepío afitó que "respeta'l desenvolvimientu del procesu y la decisión" de la maxistrada, polo que "nun va cuestionar la valoración" sobro l'estáu de salú de Fernández Villa, "acatando" l'autu conocíu ayeri.

L'autu de sobreseimientu provisional de la causa pa Fernández Villa foi dictáu pol Xulgáu d'Instrucción númberu 3 d'Uviéu'l pasáu martes, 2 d'abril, y establecía un plazu de cinco díes pa la presentación d'un recursu, daqué qu'entá podría faer la Fiscalía.