El PSOE llogra n'Asturies tres diputaos, PP-Foro llogra dos, Podemos y Vox, unu

Barbón afirma que'l PSOE ganó "alto y claro" les elecciones xenerales

El PSOE, col cien por cien de los votos escrutaos, ganó les elecciones xenerales n'Asturies col 33,24%, lo que-y da tres diputaos, los mesmos que tenía hasta agora, mintres que la coalición PP-Foro, col 23,24%, llogra dos escaños, unu más de los que llogró nos comicios del 28 d'abril.

Podemos asítiase como tercer fuerza política con un 15,96% de los sufraxos que-y dexen caltener el diputáu que yá tenía, mientres que Vox queda a mui escasa distancia como cuarta fuerza política col 15,9% de los votos, colos que caltién el so representante nel Congresu, nel que Ciudadanos, con un 6,66% de sofitos, nun consigue esta vegada revalidar l'escañu que llogró va seis meses.

Senadores

El PSOE caltién los tres senadores por Asturies que llogró nes elecciones xenerales del pasáu mes d'abril  mientres que la coalición PP-Foro revalida'l so escañu na Cámara Alta, que correspondería a la ex-presidenta popular Mercedes Fernández.

D'esta forma, la representación del PSOE nel Senáu volvería tar formada tres los comicios d'esti domingu pol ex-conseyeru d'Industria Francisco Blanco, la ex-alcaldesa de Llangréu María Fernández, y l'ex-portavoz socialista na Xunta Xeneral y ex-conseyeru d'Infraestructures, Fernando Lastra.

Pela so parte, la coalición PP-Foro consigue'l cuartu senador en disputa n'Asturies que, a falta de que se cierre l'escrutiniu, recái en Mercedes Fernández, anque por una diferencia de malapenes 800 votos con Ramón García Cañal, que llogró l'escañu na Cámara Alta'l pasáu mes d'abril.