El Principáu cifra en 52 millones los daños polos incendios d'ochobre

El segundu mes, según Sadei, con más superficie desaniciada poles llapes dende 1990

Les 13.000 hectárees desaniciaes ente'l 13 y el 19 d'ochobre provocaron daños que xuben a 52 millones d'euros, según la estimación provisional del Gobiernu.

Ochobre foi, según los datos asoleyaos güei por SADEI, el segundu mes de tola serie histórica dende 1990, con más superficie quemada, namás superáu por avientu de 2015.

El conseyeru de presidencia conseñó güei na xunta'l calter estraordinariu de la última montonera d'incendios y amosó una "condena fonda a los incendiarios". Amás, pidió la collaboración de los ciudadanos pa detectar a estes persones, porque provocar incendios ye una "acción criminal" qu'hai que persiguir.

A falta de que'l Conseyu de Gobiernu apruebe l'actualización del INFOPA, l'executivu trabaya tamién na nueva estratexa integral escontra los incendios 2018-2021. Incluyirá, según avanzó Martínez, recomendaciones a la población ante l'amenaza de les llapes y l'afite de nuevos perímetros de defensa.

Según pudo saber TPA, l'anteproyectu de presupuestos pa 2018 trai una medría del 41% na partida empobinada a la prevención de incendios. El Principáu tien previsto destinar tres millones y mediu a les entidaes locales pa financiar infraestructures de defensa escontra incendios frente a los dos millones y mediu presupuestaos pa esti añu.

Los grupos de la oposición coincidieron na necesidá de destinar más recursos a la prevención d'incendios ente crítiques a la política forestal del Principáu.