El Principáu espera pola valoración definitiva de los daños de les quemes

Va invertir 25.000 euros p'ameyorar la sede de les BRIF

Les altes temperatures y el calor tán complicando la estinción definitiva de les quemes del suroccidente. Medios humanos siguen trabayando en Corondeño (n'Allande), Vilarpedre (Grandas de Salime) y nel de L.lamas del Mouru, en Cangas.

Mientres, el Gobiernu del Principáu sigue a la espera de la valoración definitiva de los daños causaos poles quemes espardíes pel suroccidente va diez díes.

Asina lo anunció esta mañana'l Conseyeru de Presidencia, Guillermo Martínez, na visita que fizo a la Base Aérea de Tinéu, sede de les BRIF del conceyu.

Na so visita'l Conseyeru de Presidencia anunció una inversión de 25.000 euros en 2018 pa la meyora d'equipamientos y la instalación d'un quintu módulu na sede de les BRIF.

Inversión que se suma a los más de 44.000 euros nos dos últimos años nesta mesma instalación.

Énte'l problema que causen les quemes, el secretariu xeneral d'UXT, Pepe Álvarez, propunxo que se creen planes d'empléu pa que los paraos d'esti país llimpien los montes y les cunetes.