El Principáu fai un protocolu pa evitar l’accesu de los menores al xuegu

Una iniciativa precursora a la hora d’abordar los riesgos d’esti tipu de práctiques

El Principáu d’Asturies fizo’l primer protocolu autonómicu pa reforzar les midíes qu’eviten l’accesu de los menores a los xuegos d’azar y les apuestes, una iniciativa precursora a la hora d’abordar los riesgos d’esti tipu de práctiques y de la prevención de conductes adictives n’España.

El documentu, tituláu "Protocolu de menores en materia de xuegu y apuestes", contribuirá a garantizar el cumplimientu de la normativa reguladora pa frenar l’accesu de la mocedá qu’entovía nun cumplió la mayoría d’edá a los locales d’esti sector.

El conseyeru de Presidencia, Guillermo Martínez, presentó güei esti protocolu xunto cola representante del Serviciu de Xuegu del Principáu d’Asturies, Ana Ramón García, y el representante del Cuerpu Nacional de Policía Javier Cortina.

Martínez esplicó que’l protocolu forma parte del plan de prevención de la ludopatía del Principáu, y que centró los sos oxetivos en recoyer de mou ordenáu les actuaciones pa la prevención del xuegu en menores, orientar y coordinar el trabayu de los profesionales, implicar a sectores sociales y institucionales na intervención con menores, dar visibilidá al problema y sensibilizar a la población, y fixar criterios a comuña d’intervención.

Nesti sen, valoró la fechura d’una guía que fai frente a una problemática qu’esixe un "verdaderu exerciciu de responsabilidá colectiva", y qu’aborda la protección de los menores al traviés d’una rempuesta coordinada y integral.

Amás, destacó que foi posible gracies al consensu y a la participación de toles entidaes representaes nel Conseyu del Xuegu del Principáu, y que la rexón cuntará con un grupu d’Inspección del Xuegu formáu por cinco axentes de la Policía Nacional encargaos de vixilar el cumplimientu de la normativa.

Sobre esti asuntu, dio anuncia de que’l Gobiernu rexonal ta acabando un nuevu plan inspector qu’aborda la realidá d’anguaño del sector, cola fin de retrucar les necesidaes de forma ordenada y sistemática.

Por parte de so, Ramón García señaló que’l protocolu contempla actuaciones nos tres tipos de locales qu’ufierten xuegos d’azar nel Principáu: aquellos que cuenten con control d’almisión como casinos o bingos, salones de xuegu ensin vixilancia pero con recepción, y locales d’hostelería con accesu llibre y que cunten con máquines recreatives d’azar.

En toos estos casos la guía establez pautes d’actuación a la hora de prevenir l’accesu de los menores y d’intervenir en delles situaciones, y nes que tendrán un papel relevante los cuerpos y fuercies de seguridá del Estáu.

Cortina insistió en qu’al traviés d’esta guía medrarán les visites esporádiques a aquellos locales nos qu’haya pruebes de presencia de menores, y que se trabayará nel aspectu preventivu y a la hora de dar formación a los axentes.

Una iniciativa bien valorada poles asociaciones, porque’l presidente de l’Asociación de Ludópates Asociaos en Rehabilitación del Principáu d’Asturies, Máximo Gutiérrez, apuntó que medró’l númberu de mocedá que va a estos organismos en busca d’encontu, lo qu’amuesa qu’entamen a xugar a una edá bien corta.