El Principáu llicita la instalación de pantalles dixitales en 32 puertos de monte

Van ufiertar información en tiempu real sobro posibles incidencies rexistraes nes víes d'altu monte

La Conseyería de Fomentu, Cooperación Local y Prevención de Quemes llicitó, por valir de 3,1 millones d'euros, la instalación de pantalles dixitales en 32 puertos de monte asturianos, aquellos que tán asitiaos a una cota perriba de los 800 metros.

Esta convocatoria, qu'afita de plazu pa presentar ufiertes hasta'l 16 d'agostu, va dexar a los puertos de monte cuntar con una nueva señalización dixitalizada, que va ufiertar información en tiempu real sobro posibles incidencies rexistraes nes víes d'altu monte, como cortes de carretera, alertes sobro'l riesgu d'ádenes o la necesidá d'usar cadenes, esplicó'l Principáu nun comunicáu.

En concreto, van asitiase 114 pantalles informatives, tanto nos altos de los puertos como na parte baxa de los puertos escoyíos, coles mires de "ameyorar la seguridá" na rede de carreteres asturianes y de xestionar la comunicación d'una manera "más eficiente", según Fomentu, Cooperación Local y Prevención de Quemes.