El Principáu pide la declaración del estáu d'alarma pa restrinxir la movilidá nocherniega

Pieslle perimetral d'Uviéu, Xixón y Avilés

El Principáu d'Asturies pidió esti vienres al Gobiernu central la declaración del estáu d'alarma na comunidá pa restrinxir la movilidá nocherniega de la población col envís de facer frente al avance de la segunda fola de la pandemia del COVID-19.

Asina lo anunció en rueda de prensa'l presidente autonómicu, Adrián Barbón, que señaló que l'estáu d'alarma supondrá un "colchón y la rempuesta xurídica afayadiza" pa poner en marcha les decisiones de los meses vinientes, que, dixo, van ser "mui duros".

Pieslle perimetral d'Uviéu, Xixón y Avilés

El Gobiernu d'Asturies decretará dende esta medianueche'l pieslle perimetral de los núcleos urbanos d'Uviéu, Xixón y Avilés, asina como'l de l'actividá comercial a les 22:00 y de los locales d'hostelería y de xuegu a les 23:00 énte la medría de contaxos de coronavirus de los últimos díes.

L'Executivu asturianu solicitará, amás, una valoración xurídica "previa" al Tribunal Cimeru de Xusticia d'Asturies (TCXA) pa que la comunidá afite un toque de queda ente les 00:00 y les 06:00, midida pa la qu'hai una decisión "política" tomada, pero necesita garantíes.