El Principáu pide que se valore la ufierta de Quantum por Alcoa

L’Executivu tratará d’habilitar "un escenariu que dexe valorar toles ufiertes"

El Gobiernu asturianu intentará que la comisión de siguimientu pa garantizar la viabilidá d’Alcoa, qu’aconceya esti xueves, valore tanto la ufierta presentada pol fondu suizu Parter Capital como la de l’alemana Quantum, según dixo’l conseyeru de Trabayu y Industria del Principáu, Isaac Pola.

Dempués de qu’Alcoa algamare un principiu d’alcuerdu con Parter pa vende-y les plantes d’A Coruña y Avilés a diez díes de qu’acabe’l plazu p’alcontrar un comprador, el fondu alemán Quantum presentó ayeri énte’l Principáu una ufierta p’Avilés, que güei amplió pa inxertar la planta gallega.

El conseyeru afirmó que, dempués de tener conocencia esta mañana de la ufierta formal de Quantum, l’Executivu tratará d’habilitar "un escenariu que dexe valorar toles ufiertes anque fueren tan precipitaes", porque sedrá "bienveníu" cualesquier planteamientu que puea "optimizar" el resultáu final.

Según Pola, el Gobiernu asturianu ta analizando la ufierta y na xunta d’esta tarde, onde tarán presentes tolos axentes implicaos, tomaránse "les midíes que procedan".

Amás, dixo que la propuesta del grupu Parter yá ta "afitada" y pidió valorar qu’inxerte dambes plantes y que, si nun hai nengún argumentu a la escontra, s’estudie dafechu "cualquier ufierta que puea meyorar y arriquecer la solución final".

Pola compartió la valoración "positiva" de la ministra d’Industria, Reyes Maroto, al respective de la esistencia d’una ufierta que dea cobertura a bona parte de los oxetivos afitaos de mano y consideró que la ufierta de Parter aporta "tranquilidá".