El Principáu plantega la modernización de Saint-Gobain pa evitar los despidos

Podemos entruga poles midíes que va adoptar el Principáu énte'l retayu d'empléu na fábrica

El conseyeru d'Industria, Empléu y Promoción Económica del Principáu, Enrique Fernández, amosó esti xueves en sede parlamentaria la so disposición a collaborar cola planta avilesina de Saint-Gobain pa encarar una modernización qu'evite la perda d'empléu.

Fernández indicó que desque conoció les intenciones de la multinacional francesa d'aplicar un ERE d'estinción d'empléu n'Avilés pa 42 trabayadores, amosó la so disposición a collaborar ufiertando toles ferramientes y ayudes que puen usar les empreses “pa encarar una modernización y una redistribución de les llinies de producción pa caltener el nivel d'empléu”.

El conseyeru dio asina respuesta a una entruga del diputáu de Podemos Daniel Ripa sobre les midíes que va adoptar el Principáu énte'l retayu d'empléu en Saint-Gobain, que provocó una fuelga de trabayadores de 20 díes na fábrica d'Avilés.