El Principáu supervisará’l cumplimientu de les garantíes na venta d’Alcoa

Pola considera fundamental modernizar la estructura industrial d’Asturies

El conseyeru d’Industria, Trabayu y Turismu, Isaac Pola, afirmó esti llunes que’l Gobiernu asturianu supervisará que Parter Capital aporte les "garantíes esixíes" nel formatu y liquidez afayadices pa qu’acabe’l procesu de venta de les factoríes d’Alcoa d’Avilés y A Coruña.

En declaraciones a los medios, enantes de la presentación d’un proyectu dixital sobre’l patrimoniu industrial d’Asturies nel Campus d’El Milán de la Universidá d’Uviéu, Pola solliñó que’l Principáu siguirá esti procesu que tien como plazu tope’l 31 de xunetu.

L’oxetivu del Executivu autonómicu ye que Parter cumpla colos compromisos afitaos pa la venta de les plantes, y de los que tamién tarán pendientes el Gobiernu central y los sindicatos.

Sicasí, Pola faló del futuru industrial d’Asturies, que vive una situación "complicada" anguaño por "tolo que tuvo Asturies hasta agora y que quier caltener".

Pa ello, considera fundamental una modernización de la estructura industrial d’Asturies, que combine la industria tradicional cola enerxía anovable y les nueves tecnoloxíes.