El Principáu va reforzar el so apueste n'I+D+i p'asitiase a la vanguardia tecnolóxica

El Parque Tecnolóxicu d'Asturies celebra'l so 30 aniversariu

El presidente del Principáu, Adrián Barbón, sorrayó esti llunes que'l so Gobiernu "ta obligáu y decidíu a impulsar a Asturies a la vanguardia del desenvolvimientu tecnolóxicu y la innovación" y afitó que la I+D+i ye "el meyor aval, una garantía de futuru" pa encarar la transición ecolóxica y dixital na que ta la rexón.

Barbón, qu'intervino nel actu de conmemoración del 30 aniversariu del Parque Tecnolóxicu d'Asturies, amosóse "optimista" pa encarar esti retu "d'asitiar a Asturies na primer llinia de la ciencia, la investigación y la innovación".

Indicó qu'al Executivu que preside "tóca-y arriesgase a volver a faer política útil, de lluces llargues, que s'antemane a los cambeos y prepare'l porvenir" y, nesi propósitu, apuntó que'l so apueste decidíu pola I+D+i "yá nun ye namás un compromisu electoral, ye un deber col futuru d'Asturies".