El Principáu va regular los pisos turísticos pal próximu branu

L'aprobación de la llei LGTBI o crear un nuevu conceutu territorial d'Asturies, retos de Zapico

El conseyeru d'Ordenación del Territoriu, Urbanismu, Vivienda y Derechos Ciudadanos, Ovidio Zapico, resaltó güei na Feria Internacional de Muestres d'Asturies que dende'l so departamentu van desenvolvese "toles polítiques de vivienda que la llei estatal apocayá aprobada dexe" y, amás, que se va trabayar nuna regulación "que tien que tar pal branu que vien" sobre los pisos turísticos.

Zapico señaló que ye necesario "empezar a falar de zones tensionaes" y a regular esos agospiamientos y amestó esti oxetivu col retu demográficu y la manera de "enganchar a la mocedá a Asturies".

El conseyeru, que tuvo acompañáu por parte de los integrantes de la estructura del so departamentu, afitó qu'esta llexislatura "nun va haber escusa" si nun s'aprueba la Llei d'Ordenación Integral del Territoriu d'Asturies y espresó la so intención d'avanzar cola collaboración de los conceyos, que dexe encarar nuevos retos "ensin dexar a les ales escaecíes".