El SOMA-UXT defende la so actuación pol comportamientu "espantible" de Villa

Alperi amuésase confiáu en que "pague lo que tenga que pagar"

El secretariu xeneral de SOMA-FITAG-UXT, José Luis Alperi, defendió güei l'actuación del sindicatu escontra'l que fuera'l so máximu responsable 35 años, José Ángel Fernández Villa, pol so comportamientu "espantible" al regularizar na amnistía fiscal 1,2 millones con un orixe que se ta investigando.

"Nun conozo nenguna otra organización nin sindical nin política que se querellara escontra unu de los sos miembros por corrupción", señaló Alperi tres recordar que la organización demandó a Fernández Villa tres una auditoría interna que constató la presunta apropiación indebida de 434.158 euros de fondos del sindicatu.

En rueda de prensa, el dirixente del sindicatu mineru conseñó que tanto Fernández Villa como José Antonio Postigo, unu de los sos homes de confianza na central qu'ocupó'l cargu de presidente del Montepío, fueron espulsaos de la organización tres saber que dambos s'acoyeron a l'amnistía fiscal.

Alperi sorrayó la necesidá de salvaguardar les organizaciones, tanto'l sindicatu como la mutualidá minera, que tán "percima de comportamientos personales espantibles y reprochables dafechu" y polo que s'amosó enfotáu en que "paguen lo que tengan que pagar".

El so homólogu na Federación d'Industria de CCOO d'Asturies, Damián Manzano, aseguró, pela so parte, tar "bien esmolecíu" pola investigación de la "Operación Hulla" relativa al cambéu de normativa que dexó al Montepío construyir con más de 30 millones d'euros de fondos mineros la residencia xeriátrica onde se centren les investigaciones sobro l'orixe del dineru que dambos regularizaron.

"Esmoleznos y enforma que pudiera haber persones con una determinada intencionalidá" desque se punxo en marcha'l proyectu coles mires de llograr "arriquecimientos personales", apuntó en señalando que'l tiempu "ayuda y pon a caunu nel so llugar" y que, quien tien que falar sobre manera, ye la Fiscalía Anticorrupción.

Manzano alvirtió amás de qu'un casu de presunta corrupción como'l que s'investiga sobre l'usu de fondos públicos destinaos a compensar l'efectu de la reconversión minera "nun ayuda" a defender el futuru d'un sector "vidable y imprescindible", pero que tien marcada como fecha de caducidá pa les esplotaciones deficitaries el 31 d'avientu de 2018.