El Suroccidente pide rapidez pa quitar l'argayu de Casazorrina

Los vecinos alvierten del riesgu d'un corte total de la vía

Ayeri, per unes hores, tuvo cortada una de les carriles nel 'bypass' de Casazorrina, en Salas. Tuvieron faciéndose trabayos de caltenimientu, pa prevenir que puea haber un corte total de la vía. Los vecinos alvierten de qu'esi riesgu ye real y que la zona ye mui inestable.

El corte per unes hores d'una de les carriles del 'bypass' construyíu pa pasar l'argayu de Casazorrina, punxo n'alerta a los vecinos de tol Suroccidente. El tráficu tuvo acutáu pa facer llabores de llimpieza y valtu d'árboles, y evitar que llegue a la calzada y puea cortase la vía.

Los vecinos de la zona creen qu'esi riesgu ye real y alvierten de los inconvenientes que supondría que volviera cerrase al tráficu, y más nestos momentos.

Col Corredor del Narcea zarráu en Soutu, esta vía ye la principal alternativa pa canalizar tola circulación escontra'l Suroccidente. Por eso piden entainar los trabayos pa quitar l'argayu en Casazorrina y pa restituyir la ponte de La Barrosa.

Amás, piden que, mientres dure esta situación, medre'l caltenimientu nel tramu de l'antigua nacional ente Salas y La Espina, que nun ta preparada pa soportar el volume de tráficu actual.