El TCXA confirma'l sobreseimientu pa la corporación d'Ayer nel 'casu Hulla'

Vidau alvierte nel autu que'l recursu de reforma ye "una reiteración de lo yá alegao"

El Tribunal Cimeru de Xusticia d'Asturies (TCXA) confirmó'l sobreseimientu llibre nel procedimientu xudicial abiertu escontra la corporación municipal d'Ayer ente los años 2008 y 2010, de la que formaba parte na oposición l'actual vocera del PP na Xunta Xeneral, Teresa Mallada, pola cesión gratuita de los terrenos pa construyir una residencia xeriátrica en Felechosa nel 'casu Hulla'.

El maxistráu instructor de la Sala Civil y Penal del TCXA, Ignacio Vidau, asina lo envaloró tres refugar nun autu'l recursu de reforma presentáu pol Observatoriu Ciudadanu Anticorrupción d'Asturies (Ocan) escontra la so decisión, comunicada'l pasáu mes de setiembre, de sobreseer les dilixencies previes abiertes polos delitos de prevaricación alministrativa, prevaricación urbanística y tráficu d'influencies.

Vidau alvierte nel autu que'l recursu de reforma ye "una reiteración de lo yá alegao", polo qu'entiende que l'asuntu yá foi resueltu polo qu'hai qu'evitar "repeticiones innecesaries", informó esti xueves l'altu tribunal asturianu.