El TCXA reconoz el derechu a l'asistencia xurídica d'un funcionariu

Primer sentencia que reconoz esti derechu a un emplegáu públicu

El Tribunal Cimeru de Xusticia d'Asturies (TSXA) dictó una sentencia na qu'obliga al Principáu a asumir los costos de l'asistencia xurídica d'un guarda del mediu natural y funcionariu.

El fallu supón un precedente na rexón yá que ye la primer sentencia nel Principáu que reconoz el derechu a l'asistencia xurídica d'un emplegáu públicu.

Esta decisión ratifica'l fallu del Xulgáu de lo Contencioso Alministrativu númberu 4, que yá condergó al Principáu al pagu de los costos, y que foi reafitada güei pol TCXA dempués del recursu del Principáu.

L'afectáu, guarda del mediu natural y funcionariu, foi amenazáu por un home tando en funciones, y que nel xuiciu foi condergáu como autor d'un delitu leve d'amenaces.

De resultes de l'asistencia, el guarda pidió al Principáu que reconociera'l derechu a l'asistencia xurídica por ser funcionariu y abonara la factura de la so lletrada, a lo que l'alministración pública negóse.

Por esti motivu, l'home denunció al Principáu, y el Xulgáu de lo Contencioso Alministrativu númberu 4 d'Uviéu dio-y la razón en xunetu del pasáu añu con una sentencia que condergaba al Principáu al pagu y reconociendo de la mesma'l derechu a l'asistencia del funcionariu.

Tres el recursu de la sentencia, la TSXA dictaminó sentencia güei ratificando'l fallu del Xulgáu de lo Contencioso Alministrativu y obligando al Principáu a asumir los costos.

L'abogada de la defensa, Alma Pantiga, valoró esta sentencia, yá que supón un precedente na rexón y podría ser estrapolable a tolos funcionarios, yá qu'esti derechu apaez reconocíu nel Estatutu Básicu del Emplegáu Públicu.