El TCXA sobresee la causa escontra Mallada y la corporación d'Ayer pol casu Hulla

Valora que la corporación nun incurrió en delitu dalgunu

El Tribunal Cimeru de Xusticia d'Asturies (TCXA) alcordó'l sobreseimientu llibre nel procedimientu xudicial abiertu escontra la corporación municipal d'Ayer ente 2008 y 2010, de la que formaba parte la vocera parlamentaria del PP, Teresa Mallada, pola cesión gratuita de los terrenos pa construyir una residencia xeriátrica en Felechosa.

La Sala de lo Civil y Penal del TCXA dictó esti xueves un autu, del que foi ponente como instructor el maxistráu Ignacio Vidau, onde sobresee la causa abierta escontra los conceyales polos delitos de prevaricación alministrativa, prevaricación urbanística y tráficu d'influencies que-yos imputaba la Fiscalía Anticorrupción dientro del denomáu 'casu Hulla'.

El Ministeriu Fiscal consideraba que los conceyales aprobaren dexar los terrenos pa la finca 'Las Pedrosas' al Conceyu de Mieres, a pesar de cuntar colos informes desfavoratibles de la interventora y la secretaria municipal.

El TCXA, sicasí, valora que la corporación nun incurrió en delitu dalgunu porque l'alcuerdu de compra de la finca y la so posterior cesión gratuita al Montepío de la Minería fueron adoptaes respondiendo a interpretaciones xurídiques “discutibles, pero defendibles”.

L'autu nun ye firme y escontra él puen interponese los recursos de reforma énte l'instructor y d'apelación énte la Sala Civil y Penal del TCXA.