El TS indemniza con 2,5 millones d'euros a un ama de casa d'Uviéu

La mayor indemnización dada n'Asturies nesti tipu de casos

El Tribunal Supremu indemniza con 2,5 millones d'euros a un ama de casa d'Uviéu tres un accidente pol que se-y amputó una pierna y quedó tamién con secueles de tipu intestinal. Ye la mayor indemnización dada n'Asturies y una de les mayores d'España pa esti tipu de casos.

El lletráu que dirixó'l procedimientu, espertu en derechu de responsabilidá civil, Francisco Javier Gómez Gil, considera que la cantidá namás ye abonda pa llevar una vida digna y asegura que n'España va haber que crecer en formación y sensibilidá pa esti tipu de casos, pa llegar a les indemnizaciones que se tán dando por exemplu n'Inglaterra d'hasta 7 millones d'euros.

Según Francisco Javier Gómez Gil, la metá, sobre un millón y mediu d'euros, son intereses por demora de les aseguradores, y lo que verdaderamente consideren pagu polos daños sufríos son un millón que va dir nel pagu de les prótesis, l'ayuda d'un terceru, la fisioterapia o l'adecuación de la vivienda.

Aspeutos como la perda d'unos siete años d'esperanza de vida, la medría del costu de los desplazamientu o la incapacidá pal so trabayu domésticu quedaron ensin indemnizar. La llei tasa'l valor del trabayu d'un ama de casa nunos 44.000 euros, lloñe de los 360.000 que corresponderíen como salariu mínimu interprofesional.

Los espertos consideren necesaria una mayor formación por parte de lletraos y tribunales a la hora de valorar esti tipu de casos.