El balance de quemes acaba con 95 fueos en 40 conceyos asturianos

Guillermo Martínez pide condena social pa los quemadores

El Gobiernu asturianu pidió güei una reflexón amplia y ensin demagoxa al rodiu de les causes de les quemes forestales y la forma de combatiles dempués de sucedese nos últimos años foles de fueos al empar nel noroeste peninsular, y ensin que resulte creyible que toles alministraciones "lo fagan mal".

El cabezaleru del Executivu asturianu, Guillermo Martínez, espresóse asina na presentación del balance de les quemes rexistraes nos últimos díes nel Principáu, un procesu con unes característiques que fueron asemeyaes a les de la fola de fueos qu’hebo n’Asturies n’avientu de 2015.

En toos esos casos, numberosos focos entamaron a prender de forma cuasi al empar a última hora de la tarde en momentos d’alta temperatura, ensin lluvia, fuerte vientu y poca humedá nel aire y en fines de selmana. Los datos de la Fiscalía acaben que nun 76 por cientu de los casos los fueos son a posta.

La última fola, qu’obligó a activar por cuarta vez esti añu’l plan autonómicu de quemes cinco díes, saldóse con 95 quemes (46 conatos) -de les que 7 siguen ensin apagar, pero controlaes- y ensin torgues personales, menos un mancáu leve al intentar sofocar un fueu nes sos propiedaes.

Dos de les quemes, les d’Ibias y Degaña qu’amenazaron la Reserva de Muniel.los, superaron les 500 hectárees de tarrén afectáu anque, enagora, nun hai datos de la estensión total de la superficie quemada y les llames causaron daños en cuatro cases en desusu: dos cases, un garaxe y una escuela.

Nos trabayos d’estinción participaron más de 500 persones ensin que los medios aéreos pudieren prácticamente collaborar y, según Martínez, l’altu grau de collaboración ente alministraciones permitió destinar los recursos ellí onde yeren más necesarios.

Los alcaldes de la comarca caltendrán nos díes vinientes una primera xunta col conseyeru de presidencia p’articular posibles llinies d’ayuda.

Mientres, los ganaderos de la zona cuantifiquen les perdes. Naves, pastos y silos, pero tamién cabeces. En Fonteta, n’Allande, seis reses finaron tratando de fuxir de les llapes. Otru mediu centenar sufren quemadures y mancadures y nun se sabe si podrán recuperase.

Entovía hai esperanza, esta mesma mañana, los vecinos alcontraben a Bambina, una xata perdida dende’l domingu. Taba mancada, col pelo y les pates quemaes dafechu, pero confíen en que puea salir alantre.

El fueu quemó dafechu seis bones fasteres de reproducción osera ente Asturies y L’Altu Sil lleonés, según la Fundación Osu Pardu.

Técnicos d’esta fundación inspeccionarán la selmana viniente’l tarrén pa determinar los daños concretos causaos poles llapes.

La so mayor preocupación céntrase en cómo afectará al hábitat de los osos porque afiten que se perdieron cientos de carbayos y arándanos, básicos pa l’alimentación de los plantígraos.

N’Asturies hai al añu unes 1.300 quemes. 83 de cada 100 son intencionaos. Los espertos insisten en que tres les quemes declaraes estos díes n’Asturies hai una intención personal, motivada les más de les veces polos casos na rexeneración de pastos y que’l fin de los acotamientos nun camudó la situación.

Tamién reconocen que l’abandonu del monte, anque nun ye causa del fueu, si lo ye de que se propague con rapidez.

La llei namái permite la quema de matos nes quemas controlaes qu’esixe recursos de l’Alministración. Cada añu quémense de forma controlada unes 300 hectárees n’Asturies, perbaxo de la demanda de los ganaderos. Munchos reconocen que quemen, anque seya delitu. Namái l’añu pasáu 15 persones acabaron énte la xusticia por esti motivu.

Per otra parte, la normalidá reina güei nos centros hospitalarios y d’atención primaria onde nun hebo una medría de l'actividá tres la fola de quemes rexistraes nestos últimos díes na rexón. Sicasí siguirá la vixilancia, sobre manera nos grupos de riesgu.