El crime d'Ardines foi polos celos de Pedro Nieva, según la Guardia Civil

La Guardia Civil considera que'l crime "ta resueltu"

El xefe de la Unidá de Policía Xudicial de la Guardia Civil de la Comandancia de Xixón describió esti vienres a Pedro N.A., acusáu de ser l'inductor del asesinatu del conceyal d'IX de Llanes Javier Ardines, como un home "controlador" y aseguró que los celos pola so obsesión poles relación sexuales qu'ésti caltenía cola so esposa fueron la motivación d'un crime "planeáu".

Na tercer sesión del xuiciu con xuráu que se fai na Audiencia Provincial d'Uviéu, el responsable de la investigación retrucó la versión que Pedro N.A. sostuviera cuando declaró nun tonu sele que nun yera controlador y inclusive pensara en divorciase de la so esposa n'afayando la infidelidá, y asina desvenceyase de cualquier trama pa matar al edil.

L'axente detalló los mensaxes de whatsapp y de redes sociales que Pedro N.A. escribió tres saber que la so esposa engañábalu y les llamaes que fizo darréu a la vilba y la fía del edil asesináu onde, tres unvia-yos una grabación que fixo a les escondidielles nun restaurán cola que confirmó les sos sospeches, amosábase "abatíu y víctima".