El crime de Javier Ardines entamó a preparase en xunu de 2018

Los supuestos autores del crime cobraren 25.000 euros

El crime de Javier Ardines entamó a preparase en xunu de 2018, dos meses enantes del so asesinatu.

El presuntu intermediariu yá contactare colos dos supuestos sicarios, y col presuntu autor intelectual entamaron a preparar la emboscada a Javier Ardines.

Según la declaración d’unu de los presuntos autores materiales, de mano echáron-y a la víctima gas pimienta, que nun funcionó, asegura, y dempués pegáron-y col mangu de madera d’una pala y con un bate de béisbol.

Nengunu de los dos oxetos foi atopáu nos rexistros que la Guardia Civil fizo a los prindaos. Sí apaeció’l gas pimienta y una gran cantidá de dineru na casa d’Amorebieta del presuntu autor intelectual.

Según les declaraciones, Pedro Nieva pagare ente 30.000 y 35.000 euros por encargar el crime de los que 25.000 sedríen pa los presuntos autores materiales y lo demás pal intermediariu.

Detalles del crime d’Ardines qu’entamen a conocese pola declaración qu’ayeri fizo nel xulgáu unu de los arxelinos, supuestos autores materiales del crime d’Ardines.

Foi l’únicu de los prindaos que declaró énte la xueza. Reconoció que participó na preparación de la operación pero niega que matare a Ardines y culpa al so compatriota prindáu en Suiza. La intención nel ataque al ex-conceyal yera da-y un sustu, una paliza y mancalu.

Na so declaración diz qu’Ardines intentó fuxir dempués de que-y echaren gas pimienta, que-y pegaron na tiesta y cayó al suelu. Nesi momentu, Djelali B. diz que coló, que taba vivu y que foi’l so compañeru’l que quedó con él. L’arxelín afirma que s’enteró de la muerte d’Ardines al día siguiente al velu nos medios de comunicación.

L’arxelín declaró énte la xueza que reclamaron más dineru por matar a Ardines y qu’acabaron cobrando 25.000 euros ente los dos pola operación.