El númberu de contaxaos en residencies del ERA xube yá a 94

Cuatro de los 72 usuarios contaxaos morrieron

Un total de 72 residentes -dos más qu'ayeri- y 22 profesionales -cuatro más- dieron positivu al COVID-19 na rede de residencies del organismu autónomu ERA (Establecimientos Residenciales pa Vieyos), según informó la Conseyería de Derechos Sociales y Bienestar.

Cuatro de los 72 usuarios contaxaos morrieron, tres d'ellos residentes nel equipamientu de Grau, que foi medicalizáu tres un biltu qu'afectó a 59 vieyos y a trelce profesionales del centru.

Nel casu de la residencia d'El Cristo, n'Uviéu, los positivos correspuenden a un profesional, que trabaya tamién en Grau, y a dos residentes, unu d'ellos yá foi dáu d'alta, mientres qu'en Santa Teresa, tamién na capital asturiana, contaxáronse dos trabayadores.

Un residente dio positivu amás nel establecimientu de Morea mientres que nel d'El Villar, en Castrillón, el númberu de contaxaos xube a diez usuarios, unu d'ellos muertu, y a cinco profesionales, mientres qu'otros dos trabayadores del ERA contaxáronse nes residencies Naranco, n'Uviéu, y Clara Ferrer, en Xixón.

L'organismu autónomu del ERA xestiona unes 5.800 places en 34 residencies públiques y 56 concertaes.