El pabellón d'Asturies na Feria de Muestres supera les 30.000 visites na primer selmana

La organización repartió 13.000 vasos conmemorativos nos primeros siete díes de feria

El pabellón del Principáu na Feria Internacional de Muestres d'Asturies (Fidma) recibió 30.761 visites na primer selmana d'esti eventu, y nueve de cada diez foi de persones residentes na comunidá.

Amás, nos primeros siete díes de feria la organización repartió 13.000 vasos conmemorativos de la esposición, un fechu que lu convierte nunu de los regalos estrella d'esta edición de la Fidma.

Pa llogralu, les persones interesaes han de participar activamente na amuesa y responder a una serie d'entrugues sobro los conteníos.

Tamién tuvieron munchu ésitu'l simulador de la empresa Excade y l'aquaneta cedida por Facsa, instalaes nel esterior del pabellón, informa'l Principáu nun comunicáu.

Ente los próximos eventos previstos, destaquen los actos de celebración del Día del Agua, el próximu miércoles, 14 d'agostu y va presentase'l Clúster del Agua, una agrupación auspiciada pola Conseyería de Transición Ecolóxica, Industria y Desenvolvimientu Económicu, na que participen empreses públiques y privaes, consorcios y entidaes venceyaes al ciclu integral del agua.

Tamién se va celebrar una mesa redonda sobro deporte inclusivu en mediu acuáticu, na que va participar Carmen López, bicampeona mundial de surf adaptáu individual y por equipos.