El padre del ñácaru asesináu en Xixón afirma que nun tenía conocencia de la so existencia

Diz sentise culpable porque nun pudo evitar el crime

El padre del ñácaru asesináu a puñalaes por so madre namás parir na so vivienda de Xixón, declaró esti miércoles que los dos planificaron tener ún o dos fíos y que se siente culpable porque nun pudo evitar el crime.

Na tercer sesión del xuiciu con tribunal de xuráu que se desendolca na Sección Octava de l’Audiencia Provincial, nel que l’acusada s’enfrenta a un pidimientu de condena de prisión permanente revisable, el padre biolóxicu dixo que "nunca" sospechó que la so pareya pudiere tar embaranzada.

El día de los fechos, el 1 d’agostu de 2019, la so compañera, cola que tenía una rellación de pareya "normal" dende facía ocho años, pidió-y, nun mensaxe de telefonía, que-y comprare compreses al volver del trabayu porque tenía pérdides.

Al llegar a casa, nel barriu de Nuevo Roces, l’home alcontró manches de sangre nel pisu que la muyer atribuyó a pérdides por tener un quiste ováricu.

Según el so testimoniu nunca nun sospechó de que la so compañera tuviere embaranzada nin pensó na posibilidá de que fuere l’autora del crime dempués de conocer la noticia del sucesu al traviés de los medios de comunicación.