El palaciu de los Prieto-Cutre, una de les ayalgues de l'arquitectura de Ribeseya

La casona foi d'unu de los llinaxes familiares más importantes del conceyu

El palaciu de los Prieto-Cutre ye una de les ayalgues de l’arquitectura renacentista de Ribeseya. L’inmueble d’estilu platerescu foi construyíu a mediaos del XVI xunto a la plaza de la reina María Cristina. La casona foi de los Prieto-Cutre, unu de los linaxes familiares más importantes del conceyu ribeseyanu que fizo fortuna nos ámbitos militar y comercial.

Del palaciu de los Prieto-Cutre namás queda la fachada principal na que destaquen los vanos en retícula, les moldures horizontales, les columnes y les saeteres remataes en concha a los dos llaos de la puerta. L’escudu familiar ta no alto de la fachada y ta compuestu por dos llobos negros ente aspes cola lleenda 'Armas de Prieto'.

Nos años 70 del sieglu pasáu, la Diputación Provincial ufiertó’l palacete al Ayuntamientu de Ribeseya, treslladándose a esti edificiu les dependencies municipales nel branu de 1976. Tres décades más tarde, nel 2012, l’edificiu restauróse p’adaptalu a los tiempos d’anguaño por 1.650.000 euros, anque la so fachada principal caltúvose pol so valir históricu y cultural.

Lo más sorprendente del renocique más ambiciosu de la historia del palacete foi’l tratamientu de la fachada del sieglu XVI, al vese dafechu pelos dos llaos. La lluz cenital dientro del edificiu, per un gran tragalluz na cubierta, formándose un cañón de lluz nes plantes altes y baxes, que dexen pal recuerdu la escuridá que reinaba nel antiguu edificiu.

El salón de plenos, acristaláu y lluminosu, reasitióse na planta baxa, precisamente, pa da-y mayor accesibilidá y funcionabilidá a una de les cases solariegues más antigües del conceyu ribeseyanu.