El plenu del Ayuntamientu autoriza la robla del conveniu pal hospital del Grupu Quirón

Podemos vota a la escontra alegando que la operación supón un desmantelamientu de la sanidá pública

El plenu del Ayuntamientu de Xixón autorizó esta mañana la robla del conveniu pol que’l Grupu Quirón construirá un hospital nel barriu de Nuevu Xixón. L’alcuerdu afita una permuta de terrenos que dexará siguir col desendolcu del proyectu d’ampliación del Hospital de Cabueñes.

Una vegada se roble l’alcuerdu, y dempués del so asoleyamientu nel BOPA, abriráse un plazu pa la presentación de recursos. Cola robla del conveniu, el Consistoriu entregará a la empresa IDCQ les dos parceles municipales necesaries pa la construcción del hospital. A cambéu, la empresa cederá otres cuatro na contornada del Hospital de Cabueñes necesaries pa la so ampliación, que sedrán traspasaes al Principáu.

El puntu aprobóse col votu a la escontra de Podemos y l’abstención d’IX. La formación morada reprochó al equipu de Gobiernu que dexe una operación que, a xuiciu de so, supón un desmantelamientu de la sanidá pública.