El presupuestu autonómicu pa 2023 medra un 11,4% y raspia los 6.000 millones

Les cuentes rexonales pal próximu añu entamen la so tramitación parlamentaria

El proyectu de presupuestos del Principáu pa 2023 aprobáu esti xueves pol Conseyu de Gobiernu algama los 5.968 millones d'euros, un 11,4 por cientu percima de los 5.354 del actual (614 millones más), en bona parte gracies a la incorporación de 355,4 millones procedentes del Mecanismu de Recuperación y Resiliencia de la Xunión Europea.

Les cuentes rexonales pal próximu añu, qu'entamaron tamién güei la so tramitación parlamentaria, entá tán siendo oxetu de negociación colos grupos parlamentarios, anque l'Executivu d'Adrián Barbón paez tener asegurada yá la so aprobación col sofitu, polo menos, de los dos diputaos d'IX y del adscritu al Grupu Mistu.

El proyectu de llei afita destinar a gastu social 3.817 millones d'euros - cuasi 292 más que nel exerciciu anterior- de los que 2.126 son pa sanidá, qu'atropa más d'un terciu de la cuantía global de les cuentes.

Tocante a inversiones granibles, el proyectu afita fondos por importe de 921 millones, la cifra más alta de l'actual llexislatura y que nun se volvió algamar dende l'añu 2010, gracies al puxu de los fondos europeos.