El refugu al pieslle d’Alcoa algama un sofitu políticu dafechu n’Asturies

Fernández y Feijóo pidirán al Gobiernu qu’actúe énte la decisión d’Alcoa

El refugu a la decisión de la multinacional del aluminiu Alcoa de zarrar les sos plantes d’Avilés y A Coruña, que dan trabayu a 686 trabayadores, xeneró güei un sofitu políticu dafechu que s’espresó nuna declaración institucional aprobada pol plenu del parllamentu autonómicu.

La sesión foi convocada d’urxencia güei dempués de que la Xunta de Voceros consensuara’l testu que lleó'l presidente de la Xunta Xeneral del Principáu, Pedro Sanjurjo, al entamu d’una sesión siguida dende la tribuna d’invitaos por trabayadores d’Alcoa, vistíos con camisetes marielles.

La declaración refuga’l pieslle de la planta avilesina y pide a la dirección de la empresa que rectifique la so decisión al empar qu’apela a los responsables de la compañía pa qu'amuesen el so compromisu con Asturies y amuesa la so oposición al facer de la compañía, "qu’en nengún momentu avisó de les sos intenciones".

Amás, pide y sofita al Gobiernu asturianu a que tome les iniciatives afayadices énte la dirección d’Alcoa pa que refugue una midida que llevaría la perda darréu de más de 300 trabayos directos y "un duru golpe" pal pruyimientu industrial de la comarca onde la empresa ta afitada dende va más de mediu sieglu.

El parllamentu asturianu pide amás al Executivu asturianu esixir la intervención "darréu y urxente" de los ministerios d’Industria y de Transición Ecolóxica pa camudar l’anuncia d’Alcoa sobre unes instalaciones "que son un referente mundial en cuantes a la calidá de la producción".

Amás, tresllada'l so sofitu y solidaridá a la plantiya, a les sos families y a les persones afectaes, qu'esparde a la d'A Coruña, y pide al Gobiernu asturianu que lidere énte l'Executivu central estes midíes en favor del caltenimientu de la industria metalúrxica española, y sobre manera d'Asturies.

Amás de los representantes sindicales, que tres el plenu van axuntar col presidente del Principáu, Javier Fernández, la sesión foi siguida dende la tribuna d'invitaos pola delegada del Gobiernu n'Asturies, Delia Losa; l'alcaldesa d'Avilés, Mariví Monteserín, y el secretariu xeneral de la FSA-PSOE, Adrián Barbón.

Fernández y Feijóo van pidir al Gobiernu qu'actúe énte la decisión d'Alcoa

El presidente del Principáu, Javier Fernández, pidió una xunta coles ministres de Transición Ecolóxica y d'Industria, Teresa Ribera y Reyes Maroto, respectivamente, xunto al xefe del Executivu gallegu, Alberto Núñez Feijóo, pa pidir al Gobiernu que "actúe" énte la decisión d'Alcoa de cerrar les so plantes d'Avilés y A Coruña.

Fernández fixo esta anuncia en declaraciones a los periodistes n'asistiendo al plenu de la Xunta Xeneral del Principáu nel que s'aprobó por unanimidá una declaración institucional escontra la decisión de la multinacional aluminera.

"Nun tamos d'alcuerdu nin col fondu nin coles formes de la compañía", señaló'l xefe del Executivu, qu'ayeri treslladó la so postura tanto a la dirección de la multinacional como a les responsables del Gobiernu central en materia enerxético y caltuvo un contactu con Núñez Feijóo, col que se va axuntar mañana n'Uviéu.