El socialismu recupera l'alcaldía de Xixón, con Ana González al frente

La tradición d'izquierdes viose atayada polos dos mandatos de Carmen Moriyón

Xixón estrenaba la so etapa democrática cola victoria del PSOE nes primeres elecciones municipales en 1979, resultáu que llevaba a José Manuel Palacio a l'alcaldía. Responsabilidá na que repitiría cuatro años más tarde.

Sol so mandatu abordáronse proyectos como l'asfaltáu de cais de tou Xixón o'l parque de Los Pericones, el mayor de los espacios verdes de la ciudá.

En 1987, el socialismu xixonés apuesta por un relevu. Vicente Álvarez Areces ye'l so candidatu. Ye l'entamu de tres mandatos al frente del consistoriu nel que, en plena reconversión industrial, siéntense les bases del actual modelu de ciudá: el periodu de la inversión n'equipamientos pa los barrios o la recuperación de la fachada marítima.

Tamién se sienten les bases de lo que ye l'actual Parque Científicu Tecnolóxicu. Proyectu que va terminar desenvolviendo Paz Fernández Felgueroso, alcaldesa de Xixón ente 1999 y 2011.

Nes elecciones de 2011, rompíase la hexemonía del PSOE. Per primer vegada, les fuerces de centroderecha sumaben mayoría. Carmen Moriyón, ciruxana ensin esperiencia política previa, algamaba l'alcaldía. Cuatro años más tarde, Foro Asturies convertíase na fuerza más votada y repitía nel Gobiernu.

Nes elecciones de mayu, el Partido Socialista recuperaba l'alcaldía. Arrinca asina l'actual mandatu d'Ana González con un nuevu proyectu pa Xixón.

Un Xixón, señala, más participativu.