El supuestu inductor y el mediador del casu Ardines desvincúlense del crime

Pedro Nieva niega conocer a los arxelinos Djilali B. y Maamar K.

Pedro N. A., acusáu de ser l’inductor por celos del asesinatu del conceyal d’IX de Llanes Javier Ardines, y Jesús M., señaláu polos investigadores como l’intermediariu colos dos sicarios, coincidieron esti miércoles en desvinculase del crime na segunda sesión del xuiciu con xuráu popular que se celebra na Audiencia Provincial d’Uviéu.

Nes sos declaraciones, los dos negaron cualquier venceyu con una posible trama y caltuvieron que la so rellación ye d’amistá y llaboral, porque’l presuntu intermediariu trabayó na empresa d’electricidá que Pedro N. A. tenía n’Amorebieta (Vizcaya).

Jesús M., que sólo respondió a les entrugues del so abogáu defensor, almitió que, selmanes enantes del crime, viaxó xunto a Pedro N. A. dende’l País Vascu, onde vivíen los dos, hasta la parroquia llanisca de Belmonte de Pría, llugar de residencia d’Ardines.

Al entruga-y si conocía a Djilali B. acusáu de l’autoría material del crime xunto con Maamar K. a cambéu de dineru, Jesús M. dixo que coincidieren dalguna vegada pescando y que les sos conversaciones yeren normales, como con cualquier otra persona.

Dempués de la so breve declaración entamó l’interrogatoriu de Pedro N. A., que contestó a les preguntes de la so defensa y tamién a les de l’acusación particular qu’exerce la familia d’Ardines.

Pedro N. A. refugó de forma insistente cualquier tipu de venceyu col crime, tanto dende’l puntu de vista de la planificación como de la so execución, porque negó siempres conocer a los arxelinos Djilali B. y Maamar K.