El xuiciu pol crime de Javier Ardines llega al so ecuador

Pendientes los testimonios de los forenses y los guardies civiles que ficieron los informes periciales​

El xuiciu pol crime de Javier Ardines llega al so ecuador. Si se cumple’l cronograma previstu, a finales d’esti mes o entamos de d’avientu’l xuráu popular emitirá’l veredictu.

Hasta agora, na vista oral escuchóse’l testimoniu de los acusaos, de los guardies civiles que llevaron alantre la investigación y de la familia, tanto de la víctima como del presuntu inductor del crime. Ente los testimonios que queden pendientes, tán los de los médicos forenses y los guardies civiles que ficieron los informes periciales.

El xuiciu entamaba a entamos de payares col testimoniu de los acusaos negando‘l so venceyu colos fechos. Pa la Guardia Civil, los cuatro son responsables del crime. A Pedro Nieva atribúyen-y el papel d’inductor, a Jesús Muguruza, el d’intermediariu y a Maamar Kelii y Djillali Benatia los de executores del crime. Tamién tiene claro que los celos foi’l móvil del crime.

Una colopatía que, según la Guardia Civil, medró dende’l 8 d’avientu de 2017, cuando Nieva descubrió la infidelidá de la so muyer. Esta defendiólu nel xuiciu y negó que fuera una persona controladora o agresiva.

Los rexistros telefónicos, les imáxenes captaes na autopista’l día del crime y la confesión que fizo ún de los presuntos sicarios, Djillali Benatia, dempués del so prindamientu, son les pruebes nes qu’afonda la Guardia Civil. La familia de Javier Ardines insistió na so declaración en que Nieva conocía les costumes de la víctima.

Les defenses cuestionen la investigación policial y ponen l’acentu en que nel llugar del crime namás apaecieron restos d’ADN d’una muyer. Pa la Guardia Civil tán xustificaos por una tresferencia y aseguren que s’investigó al so entornu.

Esta testigu declarará a puerta zarrada pa caltener la so intimidá. Dempués de los testimonios de vecinos y amigos del conceyal asesináu, la selmana viniente llegará’l turnu de los informes periciales.