Emburria trabaya pola integración y normalización de les persones con discapacidá intelectual

Na sede atienden a 48 usuarios con edaes que van dende los 3 a los 18 años

Algamar que les persones con diversidá funcional desendolquen una vida plena nel so entornu yera’l propósitu inicial d’Emburria. De mano atendía les necesidaes d’una decena de families que buscaben una meyor calidá de vida pa los sos fíos.

Aquel proyectu inicial, qu’arrancó con un centru de día, nun dexó de medrar y la so cartera de servicios foi medrando dende entós. Los que participaron na so fundación y collaboren caldía con Emburria siéntense emocionaes cola so medría.

Nel baxu de la so sede en Cangues d’Onís funciona un centru d’atención integral, un equipamientu que cunta con sala de psicomotricidá, sala de multiestimulación y nel que trabaya un equipu profesional multidisciplinar. Atiende a 48 usuarios con edaes que van dende los 3 a los 18 años.

Nel so interés por abrise a la sociedá, Emburria punxo en marcha actividaes como 'Patios Prestosos', un proyectu qu’arrancó va seis años nel colexu cangués y que financia la conseyería d’Educación al traviés de fondos europeos, y que quier esparder a más centros educativos.

Ente los más novedosos ta’l proyectu 'Prevenir, detectar y actuar', desendolcáu en collaboración con Bienestar Social y qu’inxerta talleres selmanales colos más pequeños.