Empeoramientu de la salú mental de los convivientes d'alcohólicos

L'asociación Al-Anon quier ayudar a los familiares d'estes persones

Al-Anon, l'asociación que quier ayudar a familiares de persones alcohóliques, alerta d'un empeoramientu de la salú mental de les persones que tienen que convivir con quien carez esti problema. Nos momentos más duros de la pandemia, el númberu de llamaes al so teléfonu d'ayuda llegar a doblase. Pese a que yá volvieron les xuntes de grupu presenciales, entá nun se recuperó'l númberu avezáu de participantes, lo que nun ayudar a meyorar la calidá de vida de les persones afectaes.

Dende'l so anonimatu una persona miembru d'Al-Anon cúntanos cómo tuvo que convivir con persones alcohóliques dende la so infancia. Cuando llegó a esta asociación va cuatro años sintióse solliviada. Atopara un llugar onde compartir les sos frustraciones. Entós llegó la pandemia.

L'aisllamientu inherente a estos tiempos agravó la salú mental de los convivientes. El númberu de llamaes al teléfonu d'Al-Anon llegó a doblase nos momentos más duros. Los cuadros de depresión y d'ansiedá fixéronse más frecuentes, en dellos casos ente menores d'edá.

Les xuntes de grupu son vitales p'aprender a sobrellevar estes situaciones estremes. Les d'Al-Anon volvieron a la presencialidá n'Uviéu, Xixón, Avilés y Siero. Pero en dellos casos la participación nun algama nin a la metá de la dómina prepandemia.

Una frañidura abierta más que dexa esta crisis con una gravedá qu'entama agora a conocese, y pa la que, apunten estes muyeres, va ser necesario tener más recursos pa cerrala.