Empresarios denuncien la incoherencia del PP y Podemos coles autocaravanes

Critiquen que dellos alcaldes discutan el decretu

El coordinador de la Mesa de Turismu de la Federación Asturiana d'Empresarios, José Luis Álvarez Almeida, criticó güei al PP y Podemos por defender colos empresarios turísticos una posición tocante a la regulación de les árees p'autocaravanes y votar tolo contrario na Xunta Xeneral del Principáu.

"Tienen que dar les esplicaciones coherentes de por qué tomaron decisiones distintes o bien cambiar a los sos representantes nel Conseyu Asesor de Turismu porque sinón vamos llevantanos y colar", afirmó'l tamién presidente de la patronal de turismu Otea nuna rueda de prensa na que tuvo acompañáu pol presidente de l'Asociación d'Empresarios de Campings, Ramón Álvarez.

Álvarez Almeida referíase asina a les entrevistes qu'apocayá caltuvieron con tolos partíos con representación parlamentaria pa conocer la so posición respecto al decretu que va regular l'usu de les autocaravanes y al fechu de que nelles namás Ciudadanos tuvo a la escontra del mesmu.

Sicasí, nel plenu de la Xunta Xeneral del Principáu de la selmana pasada los votos de populares y Podemos dexaron que s'aprobara una moción de la formación naranxa na que se reclama al Gobiernu, ente otros puntos, qu'a la hora de afitar un criteriu diferenciador ente aparcar y acampar atiendan a lo afitao na guía "La movilidad en autocaravana".

Fernández Almeida recordó güei en rueda de prensa que'l decretu de turismu consensuóse y aprobóse pol conseyu asesor en 2016 "con lluz y taquígrafos y l'oxetivu puestu en regular la imaxe turística d'Asturies y non casos concretos".

"El decretu busca ameyorar la imaxe turística d'Asturies y evitar agravios ente conceyos que puen faer árees pa caravanes y otros que non", afirmó'l coordinador de la Mesa de Turismu de la FADE, qu'alvirtió de que nun-yos gustaría que'l decretu fuera refugáu pol Gobiernu.

Na so opinión, a dellos alcaldes namá-yos importa'l so problema particular, dexando de llau la imaxe qu'hai que dar a Asturies, una rexón que nun puede dexar que cada Conceyu regule los sos propios allugamientos.

N'asegurando que tán a favor de qu'haya una rede d'árees p'autocaravanes públiques y privaes, conseñó qu'éstes tienen que tener un mínimu de calidá y de servicios, como agua, lluz y desagües y que tengan la mesma imaxe.

Coles mesmes, alvirtió de que nun pue haber árees d'autocaravanes en llugares onde nun tean permitíos hoteles, restauranes o otres actividaes turístiques y qu'éstes, como recueye'l decretu, tienen que tar cerraes, cuntar con planes de seguridá, seguros y control de viaxeros.