Entidaes ecoloxistes y sociales sofiten a los acusaos por cortar los accesos n'Arcelor

Piden penes d'ente seis meses y tres años a cinco activistes climáticos

Decenes de militantes d'organizaciones polítiques, sindicales y ecoloxistes sumáronse esti xueves a la concentración de sofitu a los cinco activistes medioambientales que'l pasáu 18 de mayu cortaron dos hores los accesos a la siderúrxica d'ArcelorMittal, en Veriña, en protesta poles subvenciones públiques a empreses qu'usen combustible fósil,

Representantes d'Amnistía Internacional, Ecoloxistes n'Acción, Izquierda Xunida, Sumar, Podemos, CSI, y Soldepaz, ente otros colectivos, participaron na concentración convocada pol Grupu Rebelión o Estinción frente al Palaciu de Xusticia de Xixón, onde'l primeru de los investigaos por un delitu de coacciones declaró nel Xulgáu d'instrucción 2.

Gabriel Menéndez, que foi'l primeru en declarar mientres el restu de los investigaos tán citaos pa los próximos díes, dixo a los medios de comunicación que considera “una inxusticia” que s'abra un procesu por una protesta “lexítima” que tenía'l propósitu de denunciar la "complicidá” de les alministraciones qu'apurren dineru público a empreses que contaminen.