Equalia denuncia posible maltratu animal en siete ganaderíes asturianes de lleche

TPA Noticies tuvo accesu al documentu y a les imáxenes que s'apurren como prueba

Siete ganaderíes asturianes de lleche podríen tar cometiendo dellos delitos de maltratu animal y escontra la salú pública y alimentaria. Asina lo revela, nuna denuncia puesta en Madrid, la ONG Equalia. TPA Noticies pudo acceder al documentu y a les imáxenes que s’apurren como prueba.

Les imáxenes, cedíes por Equalia, amuesen vaques amontonaes o viviendo ente’l purín, vaques coles pates ataes, n’estrema delgadez o con barres ensin poder llevantar la cabeza, con aniellos de destete na so edá adulta o sometíes a descargues eléctriques.

Un remitente anónimu fizo llegar unes imáxenes a Equalia va unos díes, con documentación axunta, que dexaron a la ONG Equalia presentar una denuncia en primer instancia escontra siete ganaderíes de lleche d’Asturies. Acúsales de nun cumplir el Códigu Penal, la Llei de Sanidá Animal, dos reales decretos y un reglamentu européu.

La portavoz d’Equalia, María Villaluenga, esplica que "toles esplotaciones denunciaes pertenecen a un proveedor venceyáu con Supermercaos Spar". "Dende Equalia llevamos yá bastantes meses intentando que Spar inxerte una política de bienestar animal qu’enagora ye inexistente na so cadena de suministru”, señala.

La so lleche, de lo más barato del mercáu, distribúyese en tiendes de nueve comunidaes autónomes, pero non n’Asturies. Una de les esplotaciones denunciaes ta nel conceyu de Cuideiru, otra nel de Xixón, dos nel de Salas y tres nel de Tinéu.

Equalia denuncia tamién mala praxis nel manexu de los xatos. Equalia pide que s’investigue dafechu y que s’afiten les posibles responsabilidaes llegales.

Pa la ONG, estes práctiques van escontra los mandatos europeos de bienestar animal, sostenibilidá y respetu al medioambiente, tamién na producción d’alimentos.