Esmolez la sangría de sucursales bancaries en Xixón

Un problema qu'afecta sobre manera a les persones mayores

La pérdida de sucursales bancaries n’Asturies ye un problema qu’esmolez sobre manera nos conceyos de la zona rural, pero que cada vegada ye más evidente tamién nes ciudaes más poblaes. Ye’l casu de Xixón onde son delles les asociaciones vecinales que ponen el focu sobre la sangría d’oficines presenciales na ciudá.

Una realidá que repercute sobre manera nes persones mayores.

Va ocho años que’l barriu de Moreda, en Xixón, perdió la so única sucursal bancaria. Namás quedaron dos caxeros pa cuasi 3.000 habitantes. Ún zarró y otru nun funciona siempres.

N’otros barrios, como Tremañes, va yá cinco años que nun saben lo que ye tener nin sucursal nin caxeru. Un contratiempu, sobre manera pa les persones mayores.

Los más de 5.000 habitantes de Nuevo Roces toquen a cero sucursales y cero caxeros por persona.

Un informe del Bancu d’España señala qu’en marzu del añu pasáu quedaben 107 oficines presenciales, cuatro menos qu’en 2022.