Esmolición ente los ganaderos pola falta de lluvia

Los embalses d'Asturies rexistren esta selmana un 25% menos d'agua que va un añu

Nel últimu mes foi menguando’l nivel d’agua embalsao nel Principáu. Anguaño, el Principáu cunta con un 61% de capacidá, según el Ministeriu de Transición Ecolóxica, un 25% menos que va un añu per estes feches.

La situación dexa ver el pueblu de Salime, ún de los que tuvieron qu’inundase va décades pa llevantar la presa de Grandas de Salime y que cuando’l nivel del embalse baxa, puen vese les sos ruines.

La consecuencia más grave ta nel campu. En plenu mes de febreru, dalgunos praos del conceyu de Grandas de Saline tán secos, mariellos y ye que va dos meses que nun llueve, según alerta Mercedes Cruzado, secretaria xeneral de COAG Asturies.

Enagora nun hai un problema de falta de pastos, pero si nun llega l’agua, los ganaderos tendrán que comprar, más alantre, el forraxe necesario p’abastecer les sos ganaderíes. Eso supondría un importante desembolsu económicu que se xuniría yá al alza del preciu d’otros productos, como’l piensu, o’l baxu rendimientu de la lleche.

Los ganaderos crucen estos díes los deos a la espera de que, d’una vez, llegue la lluvia.