Fernández Villa, ingresáu otra vuelta nel HUCA por una insuficiencia cardiaca

L'Audiencia caltién pel momentu les sesiones del xuiciu señalaes pa la próxima selmana

L'ex-secretariu xeneral del SOMA-UXT, José Ángel Fernández-Villa, ta otra vuelta ingresáu nel Hospital Universitariu Central d'Asturies (Huca) aquexáu d'una insuficiencia cardiaca.

L'ex-líder sindical foi treslladáu anueche al centru hospitalariu al sufrir un nuevu episodiu d'indisposición y ta siendo sometíu a pruebes médiques.

Esti nuevu ingresu foi malapenes unes hores dempués de que Villa compareciera otra vuelta énte'l tribunal de la Sección Tercera de l'Audiencia Provincial d'Uviéu que lu xulga pola so presunta responsabilidá nun delitu siguíu d'apropiación indebida de fondos del sindicatu.

La vista oral volvió a entamar ayeri dempués de que tuviera que ser suspendida, el pasáu 29 de xunu, tres una hospitalización d'urxencia de Fernández-Villa cuando se desenvolvieren tres sesiones del xuiciu. Naquella ocasión, Fernández Villa tuvo ingresáu na unidá de Cardioloxía.

Les dos sesiones del xuiciu, que tán señalaes pa la próxima selmana na Audiencia Provincial d'Uviéu, caltiénense, pel momentu, por cuenta de que'l tribunal de la Sección Tercera disponga d'una notificación oficial de la defensa del so reingresu hospitalariu.

Fuentes del Tribunal Cimeru de Xusticia d'Asturies (TCXA) confirmaron que'l señalamientu del xuiciu caltiénse, pa los próximos díes 23 y 25 d'esti mes, como taba previsto primeramente, yá qu'esta mañana nun llegara entá comunicación dalguna del ingresu, anueche, de Fernández Villa nel Hospital Universitariu Central d'Asturies (HUCA).

Una vegada que se reciba esta comunicación, van pidir otra vuelta informes médicos sobre l'estáu y evolución de Fernández Villa y, cuando llogre l'alta médica, tendría que ser señaláu otra vuelta'l xuiciu nel casu de que nun se recuperara la próxima selmana.