Fernández Villa algama l’alta hospitalaria

El tribunal deberá decidir si sigue’l xuiciu onde s’interrumpió o si entama unu nuevu

L’ex-secretariu xeneral del SOMA-UXT, José Ángel Fernández Villa, abandonó ayeri pela nueche la planta de Cardioloxía del Hospital Universitariu Central d’Asturies (HUCA), onde taba ingresáu dende la nueche del vienres, 29 de xunu, alta médica qu’esti mediudía foi treslladada a la sección tercera de l’Audiencia Provincial d’Uviéu.

Fernández Villa foi treslladáu al HUCA al acabar la tercer xornada del xuiciu que se siguía hasta esi momentu escontra él pola so presunta autoría nun delitu siguíu d’apropiación indebida de fondos del sindicatu mineru, pol que’l fiscal pide una pena de cinco años de prisión, y sobre’l qu’agora’l tribunal deberá decidir si sigue nel puntu onde s’interrumpió o si va unu nuevu.

Pa ello, previsiblemente el tribunal procederá a la realización d’un informe médicu más detalláu y inclusive podría reclamar un esame forense pa ver si Villa ta en condiciones físiques de siguir col xuiciu o non nes selmanes vinientes.

Hai un plazu d’un mes dende la suspensión del xuiciu pa poder retomalu y, en casu de pasar esi periodu, habría que reinicialu otra vuelta, decisión que deberá adoptar el tribunal en función de los informes médicos.

La so situación médica obligó a suspender el xuiciu que se siguía escontra él, anque sí que se siguió col procesamientu del co-acusáu, Pedro Castillejo, ex-secretariu xeneral del Infide, dependiente del SOMA-UXT.

L’estáu de salú del ex-secretariu xeneral del sindicatu mineru foi oxetu de controversia tanto na fase d’instrucción como nos díes enantes del entamu de la vista oral porque la defensa, exercida pola lletrada Ana Boto, pidió la so suspensión pola enfermedá y falta de memoria del so veceru.

Sicasí, los forenses determinaren que sí taba en condiciones de declarar, a pesar de sufrir un deterioru cognitivu, poro, la maxistrada María Luisa Barrio, declinó suspender la causa.

N’ochobre de 2014 conocióse que Fernández Villa s’acoyere dos años enantes, de forma paralela a les últimes movilizaciones del sector mineru que lideró, a l’amnistía fiscal pa regularizar 1,4 millones d’euros, lo que llevó a la so espulsión del SOMA-UXT y del PSOE, partíu nel que fuere diputáu rexonal, senador y miembru dellos años de les sos executives federal y autonómica.

Dempués de conocese estos fechos, el sindicatu mineru presentó una querella escontra’l so ex-secretariu xeneral, que derivó na apertura de xuiciu oral cola imposición d’una fianza pol xulgáu instructor de 434.000 euros, xubida dempués a 579.000 euros.

Según el fiscal, esti dirixente sindical históricu exercía una "posición de dominiu dafechu" na organización onde tomaba toles decisiones y trazó un plan pa desviar los fondos del sindicatu al so patrimoniu personal" qu’ente 1989 y 2010 dio-y 434.158 euros.