Fomentu destina a infraestructures d'Asturies 211 millones d'euros

Un 31,33% menos que l'añu pasáu

El proyectu de Presupuestos Xenerales del Estáu prevé un retayu n'inversiones n'infraestructures en tol país. Dientro d'esi amenorgamientu, Asturies ye una de les comunidaes que sal peor parada nel repartu.

Fomentu y les entidaes estatales dependientes van disponer de 8.968,5 millones d'euros pa invertir en 2017, el 45 % más que lo executao en 2016 y el 11,6 % menos de lo presupuestao primeramente pa esi añu (10.129 millones).

La inversión estatal del sector públicu en 2017 va asitiase n'Asturies en 211,25 millones, una cifra que representa una mengua del 31,33 por cientu respecto al exerciciu anterior y que supón el 2,5 por cientu de la cuantía global en toa España frente 2,8 por cientu que representaba en 2016, según consta nel proyectu de llei de los Presupuestos Xenerales del Estáu.

Con esti datu, el Principáu asítiase como la quinta comunidá autónoma na que más cai la dotación que destinen les cuentes estatales.

Solo Andalucía, Comunidá Valenciana, Galicia y Castiella y Lleón superen a Asturies na cayida de la inversión.

La partida más cuantiosa ye la destinada a la Variante Ferroviaria de Payares.

Nel percorríu qu'afecta a Asturies, la Variante de Payares va recibir anguaño daqué más de 68.600.000 euros. Los presupuestos prevén tamién un gastu pluriañal d'equí al añu 2020 d'alredor a 39 millones d'euros partíos en tres anualidaes.

La otra inversión importante afecta a les carreteres y de forma concreta a l'autovía Uviéu-La Espina. El proyectu de presupuestos recueye daqué más de 13 millones d'euros.

D'ellos la partida más cuantiosa, 6,7 millones, destínase a los más de siete kilómetros del tramu Doriga-Corniana, 5,8 millones pal Corniana-Salas y 800.000 euros pa segunda calzada ente Salas y el viaductu d'El Regueirón.

Pa los accesos a El Musel, los presupuestos acuten 6,3 millones d'euros pal tramu Lloreda-Veriña y dos millones pal vial de Xove.

El Gobiernu acuta tamién poco más de 250.000 euros pal tercer carril de la 'Y'.