Francisco Blanco presenta la so dimisión como conseyeru d'Emplegu

"Sentíme sofitáu por Javier Fernández"

El conseyeru d'Emplegu, Industria y Turismu, Francisco Blanco, presentó la so dimisión tres cuasi dos años nel cargu pa volver al so puestu de profesor de Facienda Pública na Universidá d'Uviéu.

Blanco yá comunicara'l so propósitu hai meses al presidente del Principáu, Javier Fernández, pero depués de delles conversaciones entrambos apautaron nun facer pública la dimisión hasta qu'acabaren les primaries del PSOE, informó'l Gobiernu rexonal, que conseñó que la decisión va facese efectiva nos próximos díes.

El conseyeru tenía que responder güei a delles preguntes y interpelaciones de los grupos de la oposición nel plenu de la Xunta Xeneral, pero, tres conocerse la so renuncia, polo menos el PP anunció la so intención de retirar les cuestiones venceyaes a la so Conseyería.

Blanco ye l'únicu miembru del Gobiernu rexonal que tuvo del llau del líder electu del PSOE, Pedro Sánchez, anque na campaña de les primaries tamién se dexó ver en dalgún actu de la candidatura de Patxi López.

La dimisión de Francisco Blanco trescendido depués de que'l voceru del Executivu rexonal, Guillermo Martínez, afirmara ayeri que'l resultáu de les primaries del PSOE, que dieron la victoria a Pedro Sánchez frente a Susana Díaz, que contaba col sofitu de los principales cargos orgánicos y institucionales del socialismu asturianu, "nun afecta en nada" a la xestión del Gobiernu.

Javier Fernández dio les gracies a Francisco Blanco pol "buen trabayu fechu nos dos años de xestión".
El Gobiernu rexonal destacó que, al frente de la Conseyería d'Emplegu, Industria y Turismu, Blanco lideró les negociaciones colos sindicatos y la patronal que concluyeron cola firma del pautu pa la Competitividá Económica y la Sostenibilidá Social 2016-2019.

Tamién recordó que la meyora de les conexones aérees foi otra de les sos prioridaes, lo que favoreció qu'Asturies cuente anguaño cola meyor ufierta de vuelos de la so historia, enllaces con catorce aeropuertos nacionales y conexones directes con ocho terminales europees.
Amás, amestó que'l Gobiernu rexonal, promovió una campaña d'espansión turística que contribuyó a que'l Principáu llegare en 2016 a la cantidá récord de más de dos millones de visitantes.

L'ex-conseyeru d'Emplegu del Principáu, Francisco Blanco, señaló güei que caltién el so "compromisu" col PSOE, desvinculó la so decisión del resultáu de les elecciones primaries y anunció que siguirá como miembru de la Executiva de la FSA-PSOE.

En declaraciones a los periodistes, Blanco conseñó que plantegó la so dimisión al presidente del Principái, Javier Fernández, hai delles selmanes pa volver a la so xera como profesor universitariu y que dambos decidieron aplazala hasta que nun se superare'l procesu d'elecciones primaries nel PSOE.

"Enxamás di públicamente'l mio sofitu a nengún candidatu y nun lo voi dar agora tampoco", señaló l'ex-conseyeru tres conseñar que sigue "a disposición" del so partíu, pero qu'esi compromisu "modúlase en función de les circunstancies que van apaeciendo" n'alusión a la futura Executiva del PSOE asturianu que saldrá del Congresu que se celebre previsiblemente en setiembre.