Gobiernu y Podemos averen postures pero entá hai discrepancies

La última sesión del alderique acaba cola aprobación de 126 iniciatives rexistraes

El Gobiernu y Podemos averaron güei postures tres dos años y mediu de desalcuerdos constantes cola votación de les propuestes de resolvimientu presentaes polos grupos parllamentarios nel alderique sobro l'estáu de la rexón nel que, sicasí, tamién reflexaron les sos discrepancies.

El presidente del Principáu, Javier Fernández, volvió incidir en que'l Gobiernu rexonal caltién "la mano tendida" a Podemos pa tratar de cerrar un alcuerdu que dexe aprobar los presupuestos rexonales del próximu añu.

"Ende ta la mano tendida, a ver si ye posible consiguilo esta vegada", señaló'l xefe del Executivu asturianu al términu de la tercer y última sesión del alderique d'orientación política qu'esta selmana se celebró na Xunta Xeneral del Principáu.

Tocante a la cooficialidá del asturianu, volvió señalar qu'esta llexislatura nun se va plantegar porque'l PSOE nun lu llevaba nel so programa y porque ye un asuntu lo suficientemente sensible como pa qu'un partíu seriu plantegue nel so programa cómo quier faelo.

La última sesión saldóse cola aprobación de 126 de les 158 iniciatives rexistraes y con un mayor grau de consensu y un menor tonu de reproches ente PSOE y Podemos que'l del últimu alderique d'orientación política xeneral, lo que dexa abierta la posibilidá d'un alcuerdu p'aprobar los presupuestos.

Asina, la formación morada sofitó 19 de les 25 propuestes de resolvimientu presentaes polos socialistes mientres qu'estos pronunciáronse a favor de les iniciatives de Podemos en diez ocasiones mientres que n'otres quince votaron escontra.

El PSOE asumió cuestiones como la puesta en marcha de la Unidá Anticorrupción que reclama Podemos na negociación presupuestaria que dambos caltienen pero refugó al empar el pidimientu del partíu moráu de desarrollar el ciclu d'educación infantil de 0 a 3 años con calter públicu, universal y gratuitu.