Hasta 26 incendios forestales tán activos en 18 conceyos asturianos

Guillermo Martínez diz que son fueos provocaos

Ventiséis incendios forestales siguen activos en dieciocho conceyos asturianos, con especial importancia na contorna oriental y en concreto nel conceyu de Llanes, con ocho focos. Na so estinción trabayen 150 persones.

Según informa'l Serviciu d'Emerxencies (SEPA), nos llabores d'estinción collaboren miembros de bomberos d'esti organismu, empreses y cooperatives forestales, la guardería del Principáu y les Brigaes de Refuerzu n'Incendios Forestales (BRIF) de Tinéu y Ruente (Cantabria), amás de cinco helicópteros.

El conseyeru de Presidencia, Guillermo Martínez, asegura que son fueos provocaos. " Hai que facer un llamamientu de condena yá que la mayor parte de les quemes actives son quemes provocaes. Hai que recordar que tán prohibíes y penaes", señaló Martínez.

Les quemes forestales actives tán nos conceyos d'Allande (1), Ayer (1), Miranda (1), Cabrales (1), Ibias (1), Cangas (1), Grau (1), Grandas de Salime (1), L.lena (1), Llanes (8), Morcín (1), Peñamellera Baxa (1), Piloña (1), Sobrescobiu (1), Tinéu (1), Villaviciosa (1), Valdés (2) y Villayón (1).

El conceyu de Llanes foi'l más afectáu poles quemes forestales rexistraes n'Asturies. Contabilizáronse hasta ocho incendios güei, de los qu'inda tán activos tres n'El Cuera, dos en La Sierra Plana, y inda se trabaya n'otru más de la zona de Purón, anque prácticamente yá ta estrincáu.

La mayor parte de les zones quemaes son de monte baxu y monte altu, pero tamién hai afectaes delles repoblaciones de pinos.

Amás de Llanes, nel Oriente asturianu tamién hebo quemes nel conceyu de Cabrales. Dende Ortigueru yera visible'l fumu d'una de les quemes declaraes en Llanes, y dende la carretera d'entrada al llugar cabraliegu de La Molina podía vese la fumareda de la quema declarada yá de tarde nuna zona empruna conocida como El Cantu la Solana, asitiada na marxe derecha d'El Ríu Casañu, y alloñada de cualquier nuedu de población.

A lo llargo del día tamién hebo otra quema de pequeñes dimensiones perriba del llugar de Berodia. En dambos casos lo que quemó yera matu y monte baxu.

El fueu quedó mui cerca de les cases esta tarde nuna pequeña aldega de Valdés, en Concernosu d'Abaxu. Los bomberos trabayaron a esgaya pa evitar que les llapaes llegaren a afectar a les viviendes. Los vecinos tán mui esmolecíos nuna de les peores quemes qu'afecten al Noroccidente asturianu.